„Си бил тврдина на Православието, и со божествените догмати си ја утврдил Црквата…“
(Од Тропарот на светителот)
ВО ИМЕТО НА ОТЕЦОТ И СИНОТ И СВЕТИОТ ДУХ!
Според учењето на православната догматика, Црквата, која се наоѓа на земјата и во која ние сме крстени, и преку која ги добиваме сите свети Тајни за наше обожување по благодат и за стекнување на вечниот живот и спасението, се нарекува воинствена. Овој назив Црквата го добила, од едноставна причина што, таа секогаш се наоѓа во таква ситуација, што мора да ги одбива нападите од разните непријатели, кои имаат за цел да ѝ наштетат и да го нарушат нејзиното достоинство. Во првите три века од своето постоење на земјата, Црквата ги претрпувала силните напади од Евреите и јазичниците, а потоа, речиси целото време за нејзиното постоење, таа ги трпела нападите од разните еретици, кои на било каков начин се труделе да ги искривоколчат нејзините вистини. Таквата борба од непријателите на Православната вера продолжува и до ден денешен и, несомнено, таа борба ќе трае до крајот на светот и векот. За време на тие борби имало премногу тешки години за нашата Црква, не само кога таа била протерувана од Евреите и јазичниците, и не само кога таа била гонета од незнабожните Римјани со оган и меч, туку и тогаш, кога против неа војувале еретиците, кои за свое оружје го имале лукавството, омразата и ѓаволската итрост.
Такви тешки години за Црквата, во нејзината борба со еретиците, особено биле средните години од IV век, односно, периодот од 325 до 375 година. Тогашни непријатели на Православието биле аријанците, кои биле следбеници на александрискиот свештеник Ариј од Египет, кој богохулно го понижувал божественото достоинство на нашиот Спасител Христос. „Христос не е Бог, – говореле аријанците, – туку посебна и повисока од Бога создадена творба. Христос не е едносуштен со Бог Отец и Нему не е потребно да Му се поклонуваме како на Бог“. Иако оваа ариева ерес била осудена уште на Првиот вселенски собор во 325 година во градот Никеја од царот Константин и сите православни епископи кои биле собрани таму, а самиот Ариј бил осуден на прогонство, сепак, голем број од неговите следбеници продолжиле да дејствуваат. По извесен период од осудувањето на оваа ерес, следбениците на Ариј, со разни итроштини успеале да го Continue reading